ஆதார் அட்டையில் திருத்தம்; பரிதவிக்கும் தேனி மாவட்ட மக்கள்

தேனி மாவட்டத்தில் பொதுமக்களுக்கு வழங்கப்பட்டுள்ள ஆதார் அட்டையில் பலருக்கு பல்வேறு குளறுபடிகள் உள்ளன. இதனால் ஆதார் அட்டையில் திருத்தம் செய்யும் பணிகள் நடைபெற்று வருகின்றன.

இந்த திருத்த பணிகளுக்கு செல்லும் பொதுமக்களிடம் பல்வேறு ஆவணங்களை கேட்டு ஆதார் பதிவு , திருத்தம் செய்யும் பணியாளர்கள் பாடாய் படுத்துகின்றனர். குறிப்பாக பலரிடம் டாக்டர் சர்டிபிகேட் வேண்டும் என கேட்கின்றனர். டாக்டர் சர்டிபிகேட் வாங்கி கொடுத்தால், இந்த டாக்டர் கொடுத்தது செல்லாது, குறிப்பிட்ட சில தகுதி கொண்ட டாக்டரிடம் தான் வாங்க வேண்டும் என்கின்றனர்.

அவரிடம் வாங்கி கொடுத்தால், இவர் இதற்கு முன்னர் பலருக்கு கொடுத்துள்ளார். இதனால் இனி இவர் கொடுப்பதை பதிய மாட்டோம், இதே போல் தகுதிகள் கொண்ட வேறு டாக்டரிடம் வாங்கி வாருங்கள் என்கினற்னர்.

இதேபோல் வி.ஏ.ஓ., உள்ளிட்ட பல அலுவலர்களிடம் சான்று கேட்கின்றனர். வாங்கி கொடுத்தாலும் ஏற்பதில்லை. இதனால் ஆதார் அட்டையில் சிறு திருத்தம் செய்ய, பொதுமக்கள் பலமுறை அலைய வேண்டி உள்ளது.

இது போன்ற குளறுபடிகளை சரி செய்ய தேவையான நடவடிக்கைகளை மாவட்ட கலெக்டர் எடுக்க வேண்டும் என பொதுமக்கள் வலியுறுத்தி உள்ளனர்.