விரைவில் சுற்றுலா தலமாக மாறும் ராணிபேட்டை பிஞ்சி ஏரி

ராணிப்பேட்டை முத்துக்கடையில் 15 ஏக்கர் பரப்பளவில் பிஞ்சி ஏரி இருக்கிறது. இந்த ஏரியின் கீழ் நூற்றுக்கணக்கான ஏக்கர் விளைநிலங்கள் இருந்தது. தற்போது அவை அனைத்தும் வீட்டு மனைகளாகி விட்டன.

ஏரியும் புதர்மண்டி, கழிவுநீர் தேக்கமாக காட்சியளிக்கிறது. ஏரியில் குப்பை கொட்டி எரிக்கின்றனர். ஏரியை சுற்றி ஆக்கி ரமிப்புகளும் உள்ளது. ஆக்கிரமிப்புகளை அகற்ற வேண்டும். ஏரியை சீர மைத்து பூங்கா அமைக்க வேண்டும்.நல்லநீர் தேக்கி படகு குழாம் அமைக்க வேண்டும் என்பது நகர மக்களின் நீண்ட நாள் கோரிக்கையாக இருந்தது.

இந்நிலையில் இந்த ஏரியில் சுற்றுச்சூழல் பூங்கா அமைப்பது குறித்து ஆலோசனை கூட்டத்திற்கு கைத்தறி மற்றும் துணிநூல்துறை அமைச்சர் காந்தி தலைமை வகித்தார். முன்னாள் மத்திய இணை அமைச்சரும், அரக்கோணம் எம்பியுமான ஜெகத்ரட்சகன் முன்னிலை வகித்தார். ஏரியில் உள்ள கருவேல மரங்களை அகற்றி தூரெடுக்க வேண்டும். ஏரிக் கரையை பலப்படுத்தி நடை பாதை அமைக்க வேண்டும். மரக்கன்றுகள் நட வேண்டும். ஏரிக்கு மத்தியில் தீவு அமைப்பது, ஏரியில் நீர் தேக்கி படகு குழாம் அமைத்து மக்கள் பயன்பாட்டுக்கு படகு சவாரி இயக்குவது போன்ற பல திட்டங்களை செயல்படுத்த ஆலோசனை நடந்தது.

இதில் மாநில திமுக சுற்றுச்சூழல் அணிதுணைச் செயலாளர் வினோத்காந்தி, ராணிப்பேட்டை நகராட்சி கமிஷனர் ஏகராஜ், நகராட்சி, பொதுப்பணித்துறை பொறியாளர்கள், சுற்றுச்சூழல் வல்லுநர்கள் கலந்து கொண்டனர். இந்த திட்டம் நிறைவேற்றப்பட்டால் ராணிப்பேட்டை மாவட்டத்தில் முத்துக்கடை பகுதி ஒரு முன்மாதிரியான சுற்றுச்சூழல் பூங்காவுடன் கூடிய பொழுதுபோக்கு, சுற்றுலாதலமாக அமையும்