ஸ்ரீபெரும்புதூர் ராஜீவ் நினைவிடத்தில் காங்கிரஸார் மவுன போராட்டம்

தமிழகத்தில் நடைபெற்று முடிந்த நகர்ப்புற உள்ளாட்சி தேர்தலில், ஸ்ரீபெரும்புதூர் பேரூராட்சியில் மொத்தமுள்ள 15 வார்டுகளில் திமுக 6, காங்கிரஸ் 1, அதிமுக 3 சுயேச்சைகள் 4 மற்றும் பாமக 1 வார்டுகளில் வெற்றி பெற்றன. இதையடுத்து ஸ்ரீபெரும்புதூர் பேரூராட்சி மன்றத்திற்கு, திமுக கூட்டணியில் உள்ள காங்கிரஸ் கட்சியின் வேட்பாளராக ஸ்ரீபெரும்புதூர் நகர காங்கிரஸ் கமிட்டி தலைவர் அருள்ராஜ் என்பவரின் மனைவி செல்வமேரி என்பவர் போட்டியிட்டார்.

பேரூராட்சி மன்ற தலைவர் பதவி காங்கிரஸுக்கு ஒதுக்கப்பட்டதால், திமுகவினர் கடும் அதிருப்தி அடைந்தனர். இதனிடையே, திமுகவின் நகர செயலாளர் சதீஸ்குமாரின் மனைவி சாந்தி என்பவர், காங்கிரஸ் கட்சியின் வேட்பாளர் செல்வமேரிக்கு எதிராக போட்டியிட்டு 11 வாக்குகள் பெற்று வெற்றி பெற்றார்.

மேலும் திமுக தலைவர் மு.க. ஸ்டாலின் உத்தரவை மீறி தோழமைக் கட்சிக்கு எதிராக போட்டியிட்டு கூட்டணி தர்மத்தை மீறி வென்றவர்கள், உடனடியாக பொறுப்பை விட்டு விலகி நேரில் வந்து தன்னை சந்தித்து உரிய விளக்கம் அளிக்க வேண்டும் என உத்தரவிட்டிருந்தார்.

இந்நிலையில், திமுக தலைமை கூறியதுபோல் கூட்டணி தர்மத்தை மீறியதாலும்,கூட்டணி தர்மத்தை பாதுகாக்க சேர்மன் பதவியில் இருந்து உடனடியாக அவர் ராஜினாமா செய்ய வேண்டும் என வலியுறுத்தி ஸ்ரீபெரும்புதூர் சென்னை - பெங்களூர் தேசிய நெடுஞ்சாலையில் அமைந்துள்ள ராஜீவ் காந்தி நினைவிடத்தில் ஸ்ரீபெரும்புதூர் நகர காங்கிரஸ் கமிட்டி தலைவர் அருள்ராஜ் தலைமையில் போராட்டத்தில் ஈடுபட்டனர்.

ஸ்ரீபெரும்புதூர் பேரூராட்சி காங்கிரஸ் உறுப்பினர் செல்வமேரி உள்ளிட்ட திரளான காங்கிரசார், சுமார் 10நிமிடங்கள் வரை தியானத்தில் ஈடுபட்டனர். அதன்பிறகு ராஜீவ் காந்தி நினைவிடத்தின் நுழைவு வாயிலின் முன்பு ஆர்ப்பாட்டத்திலும் ஈடுபட்டனர். இதனால் ஏராளமான போலீசார் அங்கு பாதுக்காப்பு பணிக்காக குவிக்கப்பட்டனர்.