காஞ்சியில் மாநகராட்சி அதிகாரிகள், காவல்துறையினருக்கு இடையே வாக்குவாதம்

காஞ்சிபுரத்தில் கொரோனா பரவலை தடுக்கும் நோக்கில் காஞ்சிபுரம் ராஜாஜி காய்கறி சந்தை காஞ்சிபுரம் பேருந்து நிலையத்திற்கு இன்று முதல் மாற்றம் செய்வதாக மாவட்ட நிர்வாகம் மற்றும் பெருநகராட்சி அறிவித்திருந்தது.

மேலும் இந்த காய்கறி சந்தையில் வியாபாரிகள் மட்டுமே பொருட்களை வாங்க முடியும் எனவும் பொதுமக்களுக்கு பொருட்கள் வழங்கப்படமாட்டாது என கூறிய பெருநகராட்சி வியாபாரிகளுக்கான அடையாள அட்டையை முறையாக வழங்காததால் இன்று துவக்க நாளில் காவல்துறை அடையாள அட்டை உள்ளவர்கள் மட்டுமே பொருட்களை வாங்க அனுமதித்தனர்.

காவல்துறைக்கு முன்பே வியாபாரிகள் தங்களது இருசக்கர வாகனத்தில் பேருந்து நிலையத்தில் காய்கறி கடைகளை முன் நிறுத்தி பொருட்களை வாங்கியதால் சமூக இடைவெளி என்பது கேள்விக்குறியாகவே இருந்தது. இதைக்கண்ட காவல் ஆய்வாளர் உடனடியாக அனைத்து வாகனங்களையும் வெளியேற்றி அனுமதி உள்ளவர்கள் மட்டுமே காய்கறி வாங்க அனுமதிக்கப்பட்டனர்.

இதுகுறித்து பெரு நகராட்சி ஊழியர்கள் மற்றும் காவல்துறையினருக்கு கடும் வாக்குவாதங்கள் நிலவியது. அடையாள அட்டை வழங்கும் பணியை முறையாக மேற்கொள்ளாதது அப்பகுதியில் சமூக இடைவெளியை கண்காணிக்க பெருநகராட்சி ஊழியர்கள் மெத்தனம் காட்டியது பலரை அதிர்ச்சிக்குள்ளாக்கியது.

இதேபோல் மற்றொரு பகுதியான ஓரிக்கை பேருந்து நிலையத்தில் முறையாக கடைகளை வியாபாரிகளுக்கு ஒப்படைப்பதில் தாமதம் ஏற்பட்டதால் ஒரு சில கடைகள் மட்டுமே இயங்கியது வியாபாரிகள் வந்து ஏமாற்றத்துடன் திரும்பி சென்றனர்.