குழந்தைகளுக்கு ஏற்படும் புற்றுநோய்..! வகைகள்,காரணங்கள், சிகிச்சை..!

Pediatric Cancer,Children,Leukemia,Lymphoma,Diagnosis

"புற்றுநோய்" என்ற வார்த்தையே நம்மை பயமுறுத்தக் கூடியது. குழந்தைகளுடன் தொடர்புடையதாக இருக்கும்போது அந்தப் பயம் இன்னும் பல மடங்கு அதிகரித்துவிடும். குழந்தைப் பருவப் புற்றுநோய் ஒரு குடும்பத்தையே நிலைகுலையச் செய்துவிடும். அதைப்பற்றிய ஒரு ஆழமான பார்வை இந்தக் கட்டுரையில்.

Pediatric Cancer

குழந்தைப் பருவப் புற்றுநோய் என்றால் என்ன?

நமது உடல் பல கோடிக்கணக்கான செல்களால் ஆனது. இயல்பான நிலையில் இந்த செல்கள் வளர்ந்து, பிரிந்து, தேவைப்படும்போது இறந்தும் போகின்றன. இந்தக் கட்டுப்பாட்டில் கோளாறு ஏற்படும்போது, செல்கள் அசாதாரணமாகப் பெருகி, கட்டிகளாக உருவாகின்றன. இவற்றில் சில புற்றுநோயாக மாறிவிடுகின்றன. குழந்தைகளைத் தாக்கும் புற்றுநோய், பெரியவர்களுக்கான புற்றுநோய்களிலிருந்து வேறுபட்டது.

குழந்தைகளுக்குப் புற்றுநோய் வருவதற்கான காரணங்கள்

பெரும்பாலான சமயங்களில், குழந்தைப் பருவப் புற்றுநோய்க்கான சரியான காரணத்தை அடையாளம் காண்பது கடினம். பின்வரும் காரணிகள் குழந்தைகளில் புற்றுநோய் அபாயத்தை அதிகரிக்கக்கூடும்:

Pediatric Cancer

மரபியல் மாற்றங்கள்: சில குழந்தைகள் புற்றுநோயை உருவாக்கும் அதிக ஆபத்துள்ள குறிப்பிட்ட மரபணு மாற்றங்களுடன் பிறக்கின்றனர். குடும்பத்தில் புற்றுநோய் பாதிப்பு இருக்கும்போது இது அதிகம் காணப்படுகிறது.

கதிர்வீச்சு வெளிப்பாடு: அதிக அளவு கதிர்வீச்சு (எக்ஸ்-கதிர்கள் அல்லது பிற வகை கதிர்வீச்சு சிகிச்சைகள் போன்றவை) புற்றுநோயின் அபாயத்தை அதிகரிக்கும்.

சில மருந்துகள் மற்றும் ரசாயனங்கள்: குறிப்பிட்ட மருந்துகள் அல்லது ரசாயனங்களுக்கு வெளிப்படுவது சில வகையான குழந்தைப் பருவப் புற்றுநோய்களுடன் தொடர்புடையது.

நோய்த்தொற்றுகள்: எப்ஸ்டீன்-பார் வைரஸ் (Epstein-Barr virus) போன்ற சில வகை வைரஸ்கள் புற்றுநோய்க்கு வழிவகுக்கும்.

Pediatric Cancer

உடல் பருமன்: குழந்தை பருவத்தில் அதிக உடல் எடை கொண்டிருப்பது, பின்னாளில் சில புற்றுநோய்களை உருவாக்கும் அபாயத்தை அதிகரிக்கும்.

முக்கியக் குறிப்பு:

பெரும்பாலான சந்தர்ப்பங்களில், குழந்தைக்கு ஏன் புற்றுநோய் ஏற்பட்டது என்பதைத் தீர்மானிக்க முடியாது. மேலே குறிப்பிடப்பட்டுள்ள அபாயக் காரணிகள், புற்றுநோய் வருவதற்கான சாத்தியத்தை அதிகரிக்கும், ஆனால் அவற்றால் நிச்சயமாகப் புற்றுநோய் வரும் என்று உறுதியாகக் கூற முடியாது.

குழந்தைகளுக்குப் புற்றுநோய் ஏற்படுவதைத் தடுக்க முடியாவிட்டாலும், ஆரம்பகால கண்டறிதலும், சிகிச்சையும் குணமடைவதற்கான வாய்ப்புகளை அதிகரிக்கிறது

புற்றுநோய் வகைகள்

குழந்தைகளைத் தாக்கும் புற்றுநோய்களில் சில முக்கிய வகைகள் இங்கே:

• இரத்தப் புற்றுநோய் (லுகேமியா): வெள்ளை அணுக்களில் ஏற்படும் புற்றுநோயே லுகேமியா எனப்படுகிறது. இது குழந்தைகளில் மிகவும் பொதுவான புற்றுநோய் வகை.
  

Pediatric Cancer

• மூளை மற்றும் நரம்பு மண்டலக் கட்டிகள்: மூளை மற்றும் முதுகுத் தண்டில் உருவாகும் கட்டிகள் இந்த வகையைச் சேர்ந்தவை.
• நிணநீர் மண்டலப் புற்றுநோய் (லிம்போமா): நிணநீர்ச் சுரப்பிகளைப் பாதிக்கும் புற்றுநோய்.
  
• நரம்புத்திசுக் கட்டி (நியூரோபிளாஸ்டோமா): நரம்பு மண்டலக் கட்டிகளில் ஒரு வகை.
  
• எலும்புப் புற்றுநோய்: எலும்புகளைத் தாக்கும் புற்றுநோய்.
  
• வயிற்றுக் கட்டி (வில்ம்ஸ் கட்டி): சிறுநீரகத்தைப் பாதிக்கும் புற்றுநோய்.
  

Pediatric Cancer

அறிகுறிகள்

குழந்தைகளின் புற்றுநோயின் அறிகுறிகள் சாதாரண உடல்நலக் குறைபாடுகளைப் போன்றே தோன்றலாம். எனவே, இவற்றை கவனமாகப் புரிந்துகொள்வது அவசியம். பொதுவான சில அறிகுறிகள்:

• விவரிக்க முடியாத காய்ச்சல், தொடர்ந்த சோர்வு
  
• எடை இழப்பு அல்லது பசியின்மை
• எலும்பு மற்றும் மூட்டு வலிகள்
• காரணமில்லாமல் உடலில் கட்டிகள் தோன்றுவது
• இரவில் வியர்ப்பது, தலைவலி
• சாதாரண காயங்கள்கூட ஆறாமல் நீடிப்பது
• சருமத்தில் வெளுத்த திட்டுகள், கண்களில் மாற்றங்கள்

இந்த அறிகுறிகள் இருந்தால் கட்டாயம் புற்றுநோய் இருக்கும் என்று அர்த்தமில்லை. ஆனாலும், இவற்றை அலட்சியப்படுத்தாமல் மருத்துவரை அணுகுவது மிக அவசியம்.

Pediatric Cancer

நோய் கண்டறிதல்

மருத்துவர் உடல் பரிசோதனை செய்து, குழந்தையின் மருத்துவ வரலாற்றைப் பற்றிக் கேட்டறிவார். தேவைப்பட்டால் கீழ்க்கண்ட சோதனைகள் செய்யப் பரிந்துரைக்கப்படலாம்:

• இரத்தப் பரிசோதனைகள்: இரத்த அணுக்களின் எண்ணிக்கை மற்றும் வகைகளைப் பரிசோதிப்பது.
  
• இமேஜிங் சோதனைகள்: எக்ஸ்ரே, சிடி ஸ்கேன், எம்ஆர்ஐ ஸ்கேன் மூலம் கட்டிகள் கண்டறியப்படும்.
• எலும்பு மஜ்ஜை பரிசோதனை (Bone Marrow Biopsy): எலும்பு மஜ்ஜையில் புற்றுநோய் செல்கள் உள்ளனவா என்பதைக் கண்டறிய.

சிகிச்சை

குழந்தைகளின் புற்றுநோய் சிகிச்சை, புற்றுநோயின் வகை, பரவிய நிலை ஆகியவற்றைப் பொறுத்து அமையும். சில சிகிச்சை முறைகள்:

• கீமோதெரபி: புற்றுநோய் செல்களைக் கொல்லும் மருந்துகளைப் பயன்படுத்துதல்.
  
• கதிர்வீச்சு சிகிச்சை: புற்றுநோய்க் கட்டிகளை அழிக்க கதிர்வீச்சைப் பயன்படுத்துதல்.
  
• அறுவை சிகிச்சை: கட்டிகளை அகற்றுதல்.
  

Pediatric Cancer

• எலும்பு மஜ்ஜை மாற்று அறுவை சிகிச்சை: லுகேமியா போன்ற இரத்தப் புற்றுநோய்களுக்கு சிகிச்சையளிக்கப் பயன்படுகிறது.
• இலக்கு சிகிச்சை (Targeted therapy): புற்றுநோய் செல்கள் வளரத் தேவையான குறிப்பிட்ட மூலக்கூறுகளை இலக்காகக் கொண்ட சிகிச்சை.
  

குழந்தைகளின் புற்றுநோய் – நம்பிக்கையின் கீற்று

சிகிச்சை முறைகளில் ஏற்பட்ட மிகப்பெரிய முன்னேற்றங்களால் குழந்தைகளின் புற்றுநோய் குணப்படுத்தக்கூடிய அளவுக்கு மாறிவிட்டிருக்கிறது. ஆரம்பத்திலேயே கண்டறிந்து சிகிச்சையைத் தொடங்குவது வெற்றிக்கான வாய்ப்பை அதிகரிக்கும்.