டி20 சாம்பியன் ஆஸ்திரேலியா: அனைத்துவகை கோப்பைகளையும் வென்று அசத்தல்

ஐக்கிய அரபு அமீரகத்தில் நடைபெற்ற டி20 உலகக்கோப்பை இறுதி ஆட்டத்தில், 8 விக்கெட் வித்தியாசத்தில் நியூசிலாந்தை வீழ்த்தி, முதல்முறையாக ஆஸ்திரேலியா, கோப்பையை தட்டிச் சென்றது.

வளைகுடா நாடான ஐக்கிய அரபு அமீரகத்தில் , 7-வது 20 ஓவர் உலக கோப்பை கிரிக்கெட் தொடர், கடந்த மாதம் 17ம் தேதி தொடங்கியது. இதில், இந்தியா உள்பட, 16 அணிகள் பங்கேற்றன. சூப்பர்-12 சுற்று முடிவில் நியூசிலாந்தும், ஆஸ்திரேலியாவும் இறுதிப்போட்டிக்குள் நுழைந்தன.

துபாயில், நேற்றிரவு நடைபெற்றை போட்டியில், டாஸ் வென்ற ஆஸ்திரேலிய அணியின் கேப்டன் ஆரோன் பிஞ்ச், பந்துவீச்சை தேர்வு செய்தார். அதன்படி, முதலில் ஆடிய நியூசிலாந்து அணி, நிர்ணயிக்கப்பட்ட 20 ஓவர்களில் 4 விக்கெட் இழப்பிற்கு 172 ரன்களை குவித்தது. நியூசிலாந்து தரப்பில், அபாரமாக ஆடிய கேப்டன் கேன் வில்லியம்சன், 48 பந்துகளில் 85 ரன்கள் குவித்தார்.

நியூசிலாந்து அணி, 20 ஓவர்கள் முடிவில் 4 விக்கெட் இழப்பிற்கு 172 ரன்களை எடுத்தது. ஆஸ்திரேலியா அணிக்கு 173 ரன்கள் என்ற இமாலய இலக்கு, நிர்ணயிக்கப்பட்டது. ஆஸ்திரேலியா சார்பில் அதிகபட்சமாக ஹேசில்வுட் 2 விக்கெட் வீழ்த்தினார்.

அடுத்து, களமிறங்கிய ஆஸ்திரேலிய அணியின் துவக்க வீரராக களமிறங்கிய கேப்டன் ஆரோன் பிஞ்ச் 5 ரன்களில் ஆட்டமிழந்து, அதிர்ச்சி தந்தார். ஏமாற்றம் அளித்தார். எனினும், அந்த குறையை மற்றொரு துவக்க வீரர் வார்னர் போக்கினர். அவர், அதிரடியாக ஆடி ரன்மழை பொழிந்தார். அவர் 38 பந்துகளில் 4 பவுண்டரி, 3 சிக்சர்களுடன் 53 ரன்கள் எடுத்து வலுவான அடித்தம் அமைத்தார்.

ஆஸ்திரேலிய வீரர் மிட்செல் மார்ஷ், தன் பங்கிற்கு நியூசிலாந்து வீரர்களின் பந்தை நாலாபுறமும் அடித்தார். மேக்ஸ்வெல்லும் தன் பங்கிற்கு அசத்தினார். முடிவில், 7 பந்துகள் மீதமிருந்த நிலையில், அதாவது 18.5வது ஓவரில், ஆஸ்திரேலிய அணி173 ரன்கள் எடுத்து 8 விக்கெட் வித்தியாசத்தில் அசத்தல் வெற்றி பெற்றது. மார்ஷ் 50 பந்துகளில் 77 ரன்களுடனும், மேக்ஸ்வெல் 18 பந்துகளில் 28 ரன்களுடனும் ஆட்டமிழக்காமல் இருந்தனர்.

இந்த வெற்றியின் மூலம், ஆஸ்திரேலைய அணி டி20 உலகக் கோப்பையை வென்றுள்ளது. அதுமட்டுமின்றி, ஐசிசி-யின் அனைத்து வகை கோப்பைகளையும் வென்று சிறப்பை சேர்த்துள்ளது. கடந்த 1987, 1999, 2003, 2007, 2015ம் ஆண்டுகளில் ஒருநாள் உலகக்கோப்பை, 2006 மற்றும் 2009ம் ஆண்டில் சாம்பியன் டிராபி கோப்பையையும் ஆஸ்திரேலியா வென்றுள்ளது.