உல்லாசப் படகுப் பயணம் :ஹரீஷ் கல்யாண் - அதுல்யா ரவி

இயக்குநர் சண்முகம் முத்துசாமி இயக்கத்தில் உருவாகி வரும் படம், 'டீசல்'. முழுக்க முழுக்க வடசென்னையை மையமாகக் கொண்டு உருவாகி வருகிறது. கடந்த ஆண்டிலேயே இந்தப் படத்தின் பூஜை போடப்பட்டது என்பது குறிப்பிடத்தக்கது. இப்படத்தின் நாயகனாக ஹரீஷ் கல்யாணும் நாயகியாக அதுல்யா ரவியும் நடிக்கின்றனர். மேலும், இப்படத்தில் இயக்குநர் அமீர், கருணாஸ், யோகிபாபு ஆகியோரும் முக்கிய கதாபாத்திரங்களில் நடித்து வருகின்றனர்.

படத்தின் படப்பிடிப்பு கடந்த ஆண்டு டிசம்பர் மாத இறுதியில் தொடங்கிய நிலையில், தற்போது ஒரே கட்டமாக படப்பிடிப்பை முடித்து விட்டு விரைவில் படத்தை வெளியிட படக்குழு திட்டமிட்டுள்ளது. டி.இமான் இசையமைக்கும் இந்தப்படத்தை, எஸ்பி சினிமாஸ் தயாரித்து வருகிறது.

இந்தநிலையில், இந்தப் படத்திற்காக நடுக்கடலில் எடுக்கப்பட்ட படப்பிடிப்புகளில் ஹரீஷ் கல்யாண் மற்றும் அதுல்யா ரவி பங்கேற்றனர். சூரிய அஸ்தமனத்தில் எடுக்கப்பட்டுள்ள இந்த நிகழ்வின் வீடியோவை அதுல்யா தனது ட்விட்டர் பக்கத்தில் பகிர்ந்துள்ளார். மிகவும் ரொமாண்டிக்காக அந்த வீடியோ அமைந்துள்ளது. 'ஓ மணப்பெண்ணே' உள்ளிட்ட காதல் கதைகளில் மென்மையான கதாபாத்திரங்களில் நடித்துவந்த ஹரீஷ் கல்யாண், தற்போது இந்தப் படத்தின்மூலம் ஆக்ஷன் அவதாரம் எடுத்துள்ளார். படத்தில் அதுல்யா ரவி வழக்கறிஞராக நடித்து அசத்தியுள்ளார்.