திருத்தங்கல் பகுதியில் குடிநீர் தொட்டியை ஆய்வு செய்த மேயர்

திருத்தங்கல் பகுதியில், குடிநீர் தேக்கத் தொட்டியை சிவகாசி மேயர் திடீர் ஆய்வு மேற்கொண்டார்.

விருதுநகர் மாவட்டம் சிவகாசி மாநகராட்சிக்கு உட்பட்ட திருத்தங்கல் பகுதியின் 9வது வார்டு பகுதியில் குடிநீர் தேக்க தொட்டி நீண்ட நாட்களாக சுத்தம் செய்யப்படாமல் இருந்து வருவதாகவும், குடிநீர் தேக்கத் தொட்டியை சீரமைக்க வேண்டும் என்று, சிவகாசி மேயர் சங்கீதா இன்பம் மற்றும் அதிகாரிகளிடம் பொதுமக்கள் கோரிக்கை வைத்தனர்.

இதனையடுத்து மேயர் சங்கீதா இன்பம், ஆணையாளர் கிருஷ்ணமூர்த்தி மற்றும் அதிகாரிகள் அந்தப்பகுதிக்கு சென்று திடீர் ஆய்வு செய்தனர். உடனடியாக குடிநீர் தேக்கத் தொட்டியை சுத்தப்படுத்தும் பணிகள் நடைபெற்றது. பின்னர் குடிநீர் விநியோகம் மற்றும் குடிநீரின் தரம் உள்ளிட்டவை குறித்து அந்தப்பகுதி மக்களிடம் மேயர் சங்கீதா இன்பம் கேட்டறிந்தார். அந்தப்பகுதியில் உள்ள சாலைகள் மற்றும் கழிவுநீர் வாறுகால்களை சீரமைக்க வேண்டும் என்று பொதுமக்கள், மேயரிடம் கோரிக்கை வைத்தனர். அந்தப்பகுதியின் அனைத்து தேவைகளும் விரைந்து சரிசெய்வதற்கான நடவடிக்கைகளை எடுக்க அதிகாரிகளுக்கு மேயர் சங்கீதா இன்பம் உத்தரவிட்டார்.