திருச்சியில் சர்வதேச மண் தின விழிப்புணர்வு நிகழ்ச்சி

திருச்சி தென்னூர் நடுநிலைப்பள்ளி திருச்சி புத்தூர் கிளை நூலகம், வாசகர் வட்டம், அமிர்தம் சமூக சேவை அறக்கட்டளை இணைந்து சர்வதேச மண் தின விழிப்புணர்வு நிகழ்ச்சியினை பள்ளி வளாகத்தில் நடத்தியது. தென்னூர் நடுநிலைப்பள்ளி தலைமை ஆசிரியர் விமலா தலைமை வகித்தார். நூலகர் புகழேந்தி முன்னிலை வகித்தார். அமிர்தம் சமூக சேவை அறக்கட்டளை நிர்வாக அறங்காவலர் விஜயகுமார் சர்வதேச மண் தினம் குறித்து பேசியதாவது:-

மண்ணின் முக்கியத்துவத்தை மக்கள் உணரச் செய்யும் வகையிலும் அதைப் பற்றிய விழிப்புணர்வை ஏற்படுத்தவும் 2015ஆம் ஆண்டை சர்வதேச மண் ஆண்டாக ஐ.நா. பொதுச் சபை 2013 டிசம்பர் 20 இல் இடம்பெற்ற தனது 66ஆவது அமர்வில் அறிவித்தது. ஐ.நா. சபையின் ஓர் அங்கமான ஐக்கிய நாடுகளின் உணவு மற்றும் வேளாண்மை அமைப்பு உலக நாடுகளில் ஆண்டு முழுவதும் செயற்படுத்த பல செயல்பாடுகளுக்கு ஆலோசனை வழங்கியுள்ளது.

வரும் தலைமுறையினருக்கு மண்ணின் முக்கியத்துவத்தை அறியச் செய்வது நமது தலையாய கடமை. நம் நாடு விவசாயத்தை முக்கியத் தொழிலாகக் கொண்ட நாடு, கிராமங்கள் நிறைந்த நாடு என்று கூறினாலும் வளர்ந்து வரும் தகவல் பரிமாற்றத் தொழில் நுட்பம் நம்மை நமது மண்ணோடு நம் முன்னோர்கள் கொண்டிருந்த உறவை குறைத்து வருகிறது.

தாவரங்களுக்குத் தேவையான 18 ஊட்டச்சத்துக்களில், 15 ஊட்டச்சத்துக்கள் மண்ணால் வழங்கப்படுகின்றன. மண் என்பது உயிரினங்கள், தாதுக்கள் மற்றும் கரிம கூறுகளால் ஆனது, இது தாவர வளர்ச்சியின் மூலம் மனிதர்களுக்கும் விலங்குகளுக்கும் உணவை வழங்குகிறது.

நம்மைப் போலவே, மண்ணுக்கும் சீரான மற்றும் மாறுபட்ட ஊட்டச்சத்துக்கள் சரியான அளவுகளில் ஆரோக்கியமாக இருக்க வேண்டும். விவசாய அமைப்புகள் ஒவ்வொரு அறுவடையின் போதும் ஊட்டச்சத்துக்களை இழக்கின்றன, மேலும் மண்ணை நிலையான முறையில் நிர்வகிக்கவில்லை என்றால், வளம் படிப்படியாக இழக்கப்படுகிறது, மேலும் மண் ஊட்டச்சத்து குறைபாடுள்ள தாவரங்களை உருவாக்கும்.

மண் ஊட்டச்சத்து இழப்பு என்பது ஊட்டச்சத்தை அச்சுறுத்தும் ஒரு பெரிய மண் சிதைவு செயல்முறையாகும். உலக அளவில் உணவுப் பாதுகாப்பு மற்றும் நிலைத்தன்மை ஆகியவற்றுக்கான உலகளாவிய அளவில் இது மிகவும் முக்கியமான பிரச்சினையாக அங்கீகரிக்கப்பட்டுள்ளது.

கடந்த 70 ஆண்டுகளில், உணவில் உள்ள வைட்டமின்கள் மற்றும் ஊட்டச்சத்துக்களின் அளவு வெகுவாகக் குறைந்துள்ளது. மேலும் உலகளவில் 2 பில்லியன் மக்கள் நுண்ணூட்டச்சத்துக்கள் இல்லாததால் பாதிக்கப்படுவதாக மதிப்பிடப்பட்டுள்ளது. மண் சிதைவு காரணமாக சில மண்ணில் ஊட்டச்சத்து குறையத் தூண்டுகிறது. பயிர்களை ஆதரிக்கும் திறனை இழக்கிறது. எனவே மண் வளத்தை ஒவ்வொருவரும் அறிந்திருப்பது அவசியம்.மண்ணின் வளத்தை பாதுகாப்பதை நாம் ஒவ்வொருவரும் கடமையாக கொள்ளவேண்டும்.

இவ்வாறு அவர் பேசினார்.