தென்காசி திமுக மாவட்டச் செயலாளர் மீது மாவட்ட ஆட்சியரிடம் புகார்

தென்காசி மாவட்டம் கடையநல்லூர் வலசை கிராமத்தைச் சேர்ந்தவர் மைதீன்பாத்து. இவருக்கு புதுக்குடி கிராமத்தில் சுமார் மூன்று ஏக்கர் விவசாய நிலம் உள்ளது. இதன் அருகே திமுக வடக்கு மாவட்ட செயலாளர் செல்லதுரை என்பவருக்கு சொந்தமான இடம் உள்ளது.

செல்லத்துரை என்பவர் மேற்படி இடத்தை கிரையம் கேட்டு மிரட்டி வருகிறார். இதற்கிடையே கடந்த சில நாட்களுக்கு முன்பு எங்களது விளை நிலம் வழியாக பைப்லைன் அமைப்பதற்கு அனுமதி கேட்டார். நாங்கள் மறுத்துவிட்டோம். இந்நிலையில் அவர் உங்கள் இடத்தை போலி ஆவணம் மூலம் கைபற்றி விடுவேன் என்றும், உங்களை கொலை செய்து விடுவேன் என்று மிரட்டி வருகிறார் எனவே அவர் மீது உரிய நடவடிக்கை எடுக்க வேண்டும் என்று கூறி குடும்பத்துடன் மாவட்ட ஆட்சியர் அலுவலகத்தில் மனு அளித்தனர்.

இதுதொடர்பாக திமுக மாவட்ட செயலாளர் செல்லதுரையிடம் கேட்டபோது அவர்கள் எனக்கு அரசியலில் உள்ள நன்மதிப்பை கெடுக்கும் நோக்கில் புகார் தெரிவித்துள்ளனர். மேலும் நடைபெற்ற உள்ளாட்சித் தேர்தலில் அவர்களை சார்ந்தவர்கள் தோல்வியை தழுவியதால் இதுபோன்ற செயலில் ஈடுபடுகின்றனர். அவர்கள் கூறும் இடம் பலர் மாறி மாறி விற்பனை செய்து கடந்த 20 வருடத்திற்கு முன்பு எனது தந்தையார் வாங்கியுள்ளார். அவரிடம் உரிய ஆதாரம் இருந்தால் அவரே நிலத்தை அளந்து எடுத்துக் கொள்ளட்டும்.

இதுதொடர்பாக மாவட்ட ஆட்சியர் விசாரணை செய்து என்ன முடிவு எடுத்தாலும் அதற்கு நான் கட்டுப்படுகிறேன் என்று அவர் தெரிவித்தார்.

திமுக மாவட்ட செயலாளர் மீது மாவட்ட ஆட்சியர் அலுவலகத்தில் நில மோசடி தொடர்பாக புகார் அளித்திருப்பது அரசியல் வட்டாரத்தில் பரபரப்பை ஏற்படுத்தியுள்ளது.