முப்பது ஆண்டுகளுக்குப் பின் தமிழக அமைச்சரவையில் ராஜகண்ணப்பன்

தமிழகத்தின் முதலமைச்சராக முதன்முறையாக மு.க. ஸ்டாலின் நாளை பதவியேற்கிறார். இந்நிலையில் திமுக அமைச்சரவை பட்டியலைத் தமிழக ஆளுநர் மாளிகை வெளியிட்டுள்ளது. அதில் போக்குவரத்துத்துறை அமைச்சராக ஆர்.எஸ். ராஜகண்ணப்பன் தேர்ந்தெடுக்கப்பட்டுள்ளார்.

தமிழக அரசியலில் மிகநீண்ட வரலாற்றுக்கு சொந்தக்காரர் ராஜா கண்ணப்பன். எம்.ஜி.ஆரின் தீவிர விசுவாசியான இவர், ஜெயலலிதாவின் நம்பிக்கைக்குரியவராகவும் இருந்தவர். எம்.ஜி.ஆர் மீது கொண்ட பற்றால் 1972 ஆம் ஆண்டு தன்னை அதிமுகவில் இணைத்துக்கொண்டார். 1989 தேர்தலில் ஜெ அணி சார்பாகத் திருப்புத்தூரில் சேவல் சின்னத்தில் போட்டியிட்டு தோல்வியை தழுவினார். பின்னர் 1991 -ல் நடந்த தேர்தலில் அதிமுக சார்பாகத் திருப்புத்தூர் தொகுதியில் போட்டியிட்டு அபார வெற்றி பெற்ற இவர், ஜெயலலிதாவின் ஐந்தாண்டுகால ஆட்சியில் நெடுஞ்சாலை, பொதுப்பணித் துறை மற்றும் மின்சாரத்துறை என மூன்று துறைகளுக்கு அமைச்சராக இருந்தார். மூன்று துறைகளையும் சிறப்பாகக் கையாண்டதோடு கட்சி பணிகளையும் சிறப்பாக மேற்கொண்டதற்காக ஜெயலலிதாவின் பாராட்டுகளைப் பெற்றதோடு, 'கம்ப்யூட்டர் கண்ணப்பன்' என ஜெயலலிதா அழைக்குமளவுக்கு அவரின் நம்பிக்கைக்கு உரியவராக இருந்தார் கண்ணப்பன்.

2000 ஆவது ஆண்டு மக்கள் தமிழ்த் தேசம் என்ற தனிக்கட்சியைத் துவக்கினார். 2001 ஆண்டு இளையான்குடி சட்டமன்ற தேர்தலில் தி. மு. க கூட்டணியில் போட்டியிட்டு தோல்வி அடைந்தார். 2006 ஆம் ஆண்டு தனது கட்சியைக் கலைத்துவிட்டு தி.மு.கவில் இணைத்தார். 2006 சட்டமன்றத் தேர்தலில் தி.மு.க சார்பில் இளையான்குடியில் போட்டியிட்டு வென்ற இவர், பிப்ரவரி 2009 -ல் சட்டமன்ற உறுப்பினர் பதவியை ராஜினாமா செய்துவிட்டு, தி.மு.க -விலிருந்து விலகினார். அதன்பின்னர் மீண்டும் அதிமுகவில் இணைந்த இவருக்கு, 2009 நாடாளுமன்றத் தேர்தலில் சிவகங்கை நாடாளுமன்றத் தொகுதியில் ப.சிதம்பரத்தை எதிர்த்துப் போட்டியிடும் வாய்ப்பை வழங்கினார் ஜெயலலிதா. ஆனால், மிகக்குறைந்த வாக்கு வித்தியாசத்தில் ப.சிதம்பரத்திடம் இவர் தோல்வியைத் தழுவினார். அதன்பிறகு 2014 ஆம் ஆண்டு நாடாளுமன்றத் தேர்தலில் தென் தமிழக தேர்தல் பொறுப்பாளராகவும், 2016 சட்டசபைத் தேர்தலில் அதிமுகவின் தமிழக தேர்தல் பொறுப்பாளராகவும் ஜெயலலிதாவால் நியமிக்கப்பட்டார். 2016 ஆம் ஆண்டு சட்டசபைத் தேர்தலில் முக்கிய பங்காற்றினார்.

கடந்த 2020 ஆம் ஆண்டு பிப்ரவரி மாதம் திமுகவில் தன்னை இணைத்துக் கொண்டார். இந்த தேர்தலில் ராமநாதபுரம் மாவட்டம் முதுகுளத்தூர் தொகுதியில் போட்டியிட திமுக சார்பில் இவருக்கு வாய்ப்பு வழங்கப்பட்டது. தனது அரசியல் அனுபவத்தால் தீவிர தேர்தல் கள பணியாற்றிய இவர் 94784 வாக்குகள் பெற்று வெற்றி பெற்றார். தற்போது போக்குவரத்துத்துறை அமைச்சராக நாளை பதவியேற்க உள்ளார். 1991 சட்டசபையில் அமைச்சரவையில் இடம் பெற்ற பின், தற்போது 30 ஆண்டுகளுக்குப் பின்னர் மீண்டும் அமைச்சராகப் பொறுப்பேற்க உள்ளார். தமிழகத்தின் மிக முக்கிய துறையான போக்குவரத்து துறையை லாபகரமாக மாற்றுவார் என்று எதிர்பார்ப்போம்