கொரோனா தடுப்பூசி முகாம் பேனரில் மோடி படம் இல்லை என்றால்... எச்சரிக்கை

கொரோனா தடுப்பூசி முகாம் நடைபெறும் இடத்தில் பேனரில் மோடி புகைப்படம் இல்லையென்றால் கிழித்து எறியப்படும்- ஊராட்சி ஒன்றியக்குழுக்கூட்டத்தில் துணைத்தலைவர் பேசியதால் பரபரப்பு ஏற்பட்டது

சிவகங்கை மாவட்டம் காளையார்கோவில் ஊராட்சி ஒன்றிய அலுவலகத்தில் ஒன்றிய குழு பெருந்தலைவர் ராஜேஸ்வரி முன்னிலையில் இன்று மாதாந்திர ஒன்றியக் கவுன்சிலர் கூட்டம் நடைபெற்றது.

இந்த கூட்டத்தில் கலந்து கொண்ட ஒன்றிய துணைத் தலைவர் ராஜா பேசுகையில், கொரோனா தடுப்பூசி முகாம் நடைபெறும் இடத்தில் வைக்கப்பட்டிருக்கும் பேனரில் முன்னாள் முதல்வர் கருணாநிதி மற்றும் தமிழக முதல்வர் ஸ்டாலின் ஆகியோரின் புகைப்படம் இடம் பெற்றிருக்கிறது ஆனால், பாரதப் பிரதமர் மோடியின் புகைப்படம் இல்லை. பிரதமர் மோடியின் புகைப்படம் கண்டிப்பாக இடம்பெற வேண்டும் என்றும், காளையார்கோவில் ஒன்றியத்தில் இனி வரும் காலங்களில் முகாம் நடைபெறும் இடத்தில் பாரதப் பிரதமரின் புகைப்படம் இல்லை என்றால் பேனர்களை கிழித்து எறியப்படும். எனது சொந்தப் பணத்தில் பேனர் அடித்து தருகிறேன் என்றும்பேசினார்.

இதற்கு பதிலளித்துப் பேசிய சுகாதாரத்துறை அலுவலர் பூமிநாதன் பேனர் நாங்கள் அடிக்கவில்லை என்றும் எங்களுக்கு மேலிடத்தில் இருந்து வருவதாக பதில் அளித்தார்.மேலும் ஒவ்வொரு மாதாந்திர கூட்டத்திற்கும் வேளாண்துறை மற்றும் மின்சாரதுறையினர் பங்கேற்காமல் கூட்டத்தை புறக்கணிப்பதாக கவுன்சிலர்கள் குற்றம் சாட்டினர்.