டெண்டர் ஏலத்தில் திமுகவினர் மோதல்; நிர்வாகி மண்டை உடைப்பு, பதற்றம்
பல லட்சம் மதிப்பு பணிகளுக்கான ஏலத்தில் திமுகவினரிடையே மோதல் ஏற்பட்டு நிர்வாகி மண்டை உடைந்ததால் பரபரப்பு ஏற்பட்டது.
HIGHLIGHTS
சிவகங்கை மாவட்டம், சிவகங்கை குடிநீர் வடிகால் வாரிய அலுவலகத்தில் நடைபெற்ற பல லட்ச ரூபாய் மதிப்பிலான பணிகளுக்கான ஏலம் நடைபெற்ற நிலையில் கலந்துகொள்ளவந்த திமுகவினரிடையே மோதல் ஏற்பட்டு நிர்வாகி ஒருவருக்கு மண்டை உடைந்து மருத்துவமனையில் அனுமதிக்கப்பட்டுள்ளார்.
சிவகங்கை நகராட்சி அலுவலகம் அருகேவுள்ள குடிநீர் வடிகால் வாரிய அலுவலகத்தில் பல லட்ச ரூபாய் மதிப்பிலான ஒப்பந்த பணிகளுக்கான டெண்டர் நடைபெற்றது. இதில் பங்கேற்க திமுக மாவட்ட துணை செயலாளர் சேங்கை மாறன் மற்றும் பல திமுக ஒப்பந்ததாரர்களும் பங்கேற்றனர்.
இதில் திடீரென திமுக மாவட்ட துணை செயலாளர் சேங்கைமாறன் அணியினருக்கும், திமுக நிர்வாகி கோவானூர் சோமன் என்பவரது அணிக்கும் இடையே கடும் வாக்குவாதம் ஏற்பட்டதாக கூறப்படுகிறது. இந்நிலையில் இருதரப்புக்குமிடையே கைகலப்பு ஏற்பட்டு அருகில் இருந்த சேரை கொண்டு தாக்கி கொண்டதில் திமுக நிர்வாகி சோமன் என்பவருக்கு தலையில் பலத்த காயம் ஏற்பட்டது.
இதனைத்தொடர்ந்து சோமனின் ஆதரவாளர்கள் எதிர் தரப்புடைய காரை கல்லால் அடித்து தாக்கியுள்ளனர். தகவலறிந்து சம்பவ இடத்திற்கு வந்த காவல்துறையினர் இருதரப்பினரையும் சமாதானப்படுத்தி காயமடைந்தவரை மருத்துவமனைக்கு அனுப்பி வைத்தனர். திமுகவினர் மோதல் சம்பவத்தால் அப்பகுதி முழுவதும் பரபரப்பு ஏற்பட்டது.