கர்ப்பிணி பெண்களுக்காக இரத்ததான முகாம்: அமைச்சர் பங்கேற்பு

சிவகங்கை மாவட்ட சுற்றுவட்டார பகுதியில் இருந்து வரக்கூடிய கர்ப்பிணி பெண்களுக்கு போதிய இரத்த வகைகள் இரத்த வங்கியில் இருப்பு இல்லாததால், இரத்த வங்கியின் வேண்டுகோளை ஏற்று வாலாஜா நவாப் அறக்கட்டளை கடந்த 2 ஆண்டுகளில் மட்டும் 5 முறை இரத்ததானம் நடத்தி 200க்கும் அதிகமான யூனிட் இரத்தம் இரத்த வங்கிக்கு வழங்கியுள்ளது.

இந்த இரத்த தான முகாமில் அனைத்து சமுதாய மக்களும், இளைஞர்களும் தொடர்ந்து ஆர்வத்துடன் கலந்து கொண்டு இரத்த தானம் செய்து வருகின்றார்கள். சிவகங்கை வாலாஜா நவாப் ஜும்ஆ பள்ளிவாசலில் நடைபெற்ற முகாமில் 42 நபர்கள் இரத்ததானம் செய்தார்கள். இரத்ததான முகாமை தமிழக ஊரக வளர்ச்சித்துறை அமைச்சர் கே.ஆர்.பெரியகருப்பன் அவர்கள் பார்வையிட்டு இரத்ததானம் செய்தவர்களுக்கு சான்றிதழ்களை வழங்கினார்கள்.

நிகழ்ச்சியில் சிவகங்கை மருத்துவக் கல்லூரி முதல்வர் டாக்டர் ரேவதி பாலன், மருத்துவக்கல்லூரி இரத்த வங்கியின் தலைவர் டாக்டர் கிருஷ்ணவேணி மருத்துவமனையின் RMO முஹம்மது ரபீக் உள்பட மருத்துவமனையிலிருந்து பலரும் கலந்து கொண்டனர். சிறப்பு விருந்தினராக மானாமதுரை சட்டமன்ற உறுப்பினர் தமிழரசி, சிவகங்கை மாவட்ட ஐக்கிய ஜமாஅத்தின் மாவட்ட தலைவர் நாடாஅன்வர், சிவகங்கை நகர திமுக செயலாளர் துரை ஆனந்தன் உட்பட பலரும் கலந்து கொண்டனர்.

இந்த இரத்ததான முகாம் சிவகங்கை வாலாஜா நவாப் ஜும்ஆ பள்ளிவாசல் தலைவர் அன்வர் பாஷா அவர்கள் தலைமையில் நடைபெற்றது.