புதுக்கோட்டையில் ஊரடங்கால் உணவின்றி தவித்த ஆதரவற்றோருக்கு இளைஞர்கள் உதவி

கொரோனா வைரஸ் தொற்று காரணமாக தமிழகம் முழுவதும் ஒவ்வொரு வாரமும் ஞாயிற்றுக்கிழமை முழு ஊரடங்கு தமிழக அரசு பிறப்பித்துள்ளது. அதனையொட்டி இன்று இரண்டாவது வார ஞாயிற்றுக் கிழமை முழு ஊரடங்கு தமிழகம் முழுவதும் அமல்படுத்தப்பட்டுள்ளது.

இதன் காரணமாக அத்தியாவசிய தேவைகளுக்கு தவிர யாரும் வெளியே வரக்கூடாது என தமிழக அரசு அறிவித்துள்ளது. ஊரடங்கை மீறுபவர்கள் மீது கடும் நடவடிக்கை எடுக்கப்படும். வாகனத்தில் வருபவர்கள் மீது நடவடிக்கை எடுக்கப்படும் என அரசு தரப்பில் அறிவிக்கப்பட்டுள்ளது. இதன் காரணமாக புதுக்கோட்டை மாவட்டத்தில் அனைத்து இடங்களும் வெறிச்சோடி காணப்பட்டது.

இதேபோல் புதுக்கோட்டை நகர பகுதிகளில் புதிய பேருந்து நிலையம் பழைய பேருந்து நிலையம் அண்ணா சிலை கீழராஜவீதி உள்ளிட்ட அனைத்து பகுதிகளும் ஆள் நடமாட்டம் இன்றி வெறிச்சோடி காணப்பட்டது. இதனால் சாலை ஓரங்களில் ஆதரவற்றோர் இருக்கும் பொது மக்களுக்கு உணவு கிடைப்பதில் மிக சிரமம் அடைந்தனர்.

ஊரடங்கு காரணமாக உணவில்லாமல் தவிக்கும் பொது மக்களுக்கு உணவு வழங்க வேண்டும் என நினைத்த இளைஞர்கள், தெற்கு மூன்றாம் வீதிகளில் திமுக நகர கழக செயலாளரும், சமூக ஆர்வலருமான நைனா முகமது தன்னுடைய அலுவலகம் முன்பு அமுதசுரபி என்னும் ஒரு திட்டத்தை துவங்கி தினம்தோறும் நூற்றுக்கும் மேற்பட்டோர் குளிர்சாதனப் பெட்டியில் கொண்டுவந்து வைக்கப்படும் உணவை அனைத்து பொதுமக்களும் எடுத்துச் செல்வார்கள் தற்போது இன்று ஞாயிற்றுக்கிழமை முழு ஊரடங்கு என்பதால் நடமாடும் அமுதசுரபியை நகரக் கழகச் செயலாளர் நைனா முகமது மகன் தன்வீர் முகமது ஏற்பாட்டில் நடமாடும் அமுதசுரபியை துவங்கி இருசக்கர வாகனங்களில் நூற்றுக்கும் மேற்பட்ட சாலையோரம் உள்ள பொதுமக்களுக்கு வாகனத்தில் சென்று உணவுகளை வழங்கினர்.

ஊரடங்கு காரணமாக உணவு இல்லாமல் தவித்த பொதுமக்களுக்கு இந்த இளைஞர்கள் செய்த உதவி அனைவரிடத்திலும் பாராட்டைப் பெற்றது.