புதுக்கோட்டை வங்கி வாடிக்கையாளர்கள் தொடர்பு திட்ட முகாமில் ரூ.49.97 கோடி கடனுதவி

புதுக்கோட்டையில் நடைபெற்ற வங்கி வாடிக்கையாளர்கள் தொடர்பு திட்ட முகாமில் 849 பயனாளிகளுக்கு ரூ.49.97 கோடி கடனுதவி வழங்கப்பட்டது.

புதுக்கோட்டை புதிய பேருந்து நிலையம் அருகில் உள்ள ஆயுதப்படை சமுதாயக் கூடத்தில் மாபெரும் வங்கி வாடிக்கையாளர்கள் தொடர்பு திட்டம் முகாம் மாவட்ட ஆட்சித் தலைவர் கவிதா ராமு தலைமையில் இன்று (18.10.2021) நடைபெற்றது. இம்முகாமை மாவட்ட ஆட்சித் தலைவர் துவக்கி வைத்து வங்கிகளின் கண்காட்சி அரங்குகளை பார்வையிட்டார். மேலும் நேர்மைக்கான குடிமக்களின் உறுதிமொழியினை அனைவரும் எடுத்துக்கொண்டனர்.

பின்னர் மாவட்ட ஆட்சித் தலைவர் பேசியதாவது: புதுக்கோட்டை மாவட்டத்தில் 24 வங்கிகளும் அதனுடைய 217 கிளைகளும் பொதுமக்கள் சேவையில் செயல்பட்டு வருகிறது. வங்கி சேவைகள் குறித்து வாடிக்கையாளர்கள் அறிந்து கொள்ளும் வகையில் அனைத்து வங்கிகளும் ஓர் இடத்தில் குழுமி மாபெரும் வங்கி வாடிக்கையாளர் தொடர்பு திட்ட முகாம் இன்றையதினம் நடைபெற்று வருகிறது. மேலும் இம்முகாமில் 849 வாடிக்கையாளர்களுக்கு ரூ.49.97 கோடி மதிப்பீட்டில் பல்வேறு கடனுதவித் தொகைக்கான காசோலைகள் வழங்கப்பட்டுள்ளது.

இம்முகாமில், பொதுமக்களுக்கு வங்கிகள் மூலம் வழங்கப்படும் தனிநபர் கடன், சுயதொழில் கடன், தொழில் கடன் போன்ற பல்வேறு கடன்கள் குறித்து விளக்கமாக விவரங்கள் தெரிவிக்கப்படுகிறது. பல்வேறு வங்கிகளும் ஓர் இடத்தில் இருப்பதால், பொதுமக்கள் வங்கிகள் மூலம் வழங்கப்படும் கடன்தொகைகள் குறித்தும் வட்டி விகிதம் குறித்தும் தெரிந்து கொண்டு பயன்பெறலாம். எனவே, இம்முகாமில் கலந்து கொண்ட பொதுமக்கள் வங்கிகளில் நடைமுறையில் உள்ள பல்வேறு திட்டங்கள் குறித்து தெரிந்துகொண்டு பயன்பெறலாம் என்றார் ஆட்சியர்.

இம்முகாமில், மகளிர் திட்ட இயக்குநர்ரேவதி, ஐஓபி வங்கி காரைக்குடி மண்டல முதன்மை மேலாளர் வி.மலர்விழி, மாவட்ட முன்னோடி வங்கி மேலாளர் ஆர்.ரமேஷ், பொது மேலாளர் (மாவட்ட தொழில் மையம்) திரிபுர சுந்தரி, வருவாய் கோட்டாட்சியர் அபிநயா, மாவட்ட திட்ட மேலாளர் (தாட்கோ) முத்துரத்தினம் மற்றும் அலுவலர்கள் கலந்து கொண்டனர்.