நாமக்கல் அருகே 6 வாகனங்கள் அடுத்தடுத்து மோதி விபத்து: 5 பேர் காயம்

நாமக்கல், திருச்சி மெயின் ரோடு என்.புதுப்பட்டியில், நேற்றிரவு 10 மணியளவில் சரக்கு ஆட்டோ டிரைவர் ஒருவர் ஆட்டோவை ரோட்டோரம் நிறுத்திவிட்டு, அருகில் இருந்த பேக்கரியில் டீ குடித்துக் கொண்டிருந்தார். அப்போது நாமக்கல்லில் இருந்து திருச்சி நோக்கி, செங்கல் பாரம் ஏற்றிச் சென்ற லாரி ஒன்று, சரக்கு ஆட்டோ மீது மோதியது.

லாரி மோதிய வேகத்தில் சரக்கு ஆட்டோ முன்னால் நின்று கொண்டிருந்த ஒரு கார் மற்றும் மோட்டார் சைக்கிள் மீது மோதியது. அத்துடன், பின்னால் வந்து கொண்டிருந்த டிராக்டர் மற்றும் காய்கறி ஏற்றி வந்த 2 லாரிகள் அடுத்தடுத்து விபத்தில் சிக்கிய லாரி மீது மோதின.

இந்த விபத்தில், லாரி ஒன்று பேக்கரிக்குள் புகுந்தது. மற்றொரு லாரி, கார் மீது ஏறி நின்றது. இந்த விபத்தில் லாரி டிரைவர்கள் உட்பட 5 பேர் காயம் அடைந்தனர். தகவல் கிடைத்ததும், மோகனூர் போலீசார் அங்கு விரைந்து சென்று விபத்தில் சிக்கியவர்களை மீட்டு சிகிச்சைக்காக நாமக்கல் அரசு ஆஸ்பத்திரிக்கு அனுப்பி வைத்தனர். விபத்தில் சிக்கிய வாகனங்கள் கிரேன் மூலம் மீட்கப்பட்டன. இதனால், போக்குவரத்து சிறிது நேரம் பாதிக்கப்பட்டது.