நாமக்கல் நகராட்சி பள்ளியில் கற்றல் திறன் குறித்து குழந்தைகளுடன் கலெக்டர் கலந்துரையாடல்

நாமக்கல் நகராட்சிக்குட்பட்ட, கொண்டிசெட்டிப்பட்டி நகராட்சி நடுநிலைப்பள்ளிக்கு மாவட்ட கலெக்டர் ஸ்ரேயாசிங் வருகை புரிந்தார். அவர் அங்கு படிக்கும் மாணவ மாணவிகளிடம் புத்தகங்களை பார்த்து கதைகளை வாசிக்க சொல்லியும், பாடல்களை பாடச்சொல்லியும் 3-ஆம் வகுப்பு மாணவ, மாணவியர்களின் கற்றல் திறன் குறித்து ஆய்வு செய்தார். சத்துணவு சமையல் கூடத்தினை அவர் பார்வையிட்டு, உணவுப் பொருட்களின் இருப்பு குறித்து ஆய்வு செய்தார். தொடர்ந்து கொண்டிசெட்டிப்பட்டி தொடக்க வேளாண்மை கூட்டுறவு கடன் சங்கத்தில் பொதுமக்களுக்கு வழங்கப்படும் சேவைகள் குறித்தும், வங்கிகளுக்கு இணையாக பொதுமக்களுக்காக ஏற்படுத்தப்பட்டுள்ள வசதிகள் குறித்தும் பார்வையிட்டு ஆய்வு மேற்கொண்டார்.

சங்கத்தில் செயல்படும் இ-சேவை மையத்தில் வழங்கப்படும் சேவைகள் குறித்து, பொதுமக்கள் எளிதில் அறிந்து கொள்ளும் வகையில் அறிவிப்பு பலகையினை காட்சிப்படுத்த வேண்டும் என்று அலுவலர்களை அறிவுறுத்தினார். பின்னர், கொண்டிசெட்டிப்பட்டி மற்றும் பெரியப்பட்டி கிராம நிர்வாக அலுவலகங்களில் திடீர் ஆய்வு மேற்கொண்ட கலெக்டர் அங்கு பராமரிக்கப்பட்டு வரும் பதிவேடுகளை பார்வையிட்டார். அப்போது பல்வேறு சான்றுகள் கோரி பொதுமக்கள் விண்ணப்பிக்கும் போது, விரைந்து ஆவணங்கள் சரிபார்த்து அவர்களுக்கு சான்றுகளை அளிக்க ÷ வேண்டும் என விஏஓக்களை அறிவுறுத்தினார்.