குமாரபாளையத்தில் காந்தி பிறந்த நாள் விழா மற்றும் கிராம சபா கூட்டங்கள்
குமாரபாளையத்தில் காந்தி பிறந்த நாள் விழா கொண்டாடப்பட்டது. கிராம சபா கூட்டங்களும் நடத்தப்பட்டது.
HIGHLIGHTS
குமாரபாளையம் அரசு ஆண்கள் மேல்நிலைப்பள்ளியில் விடியல் ஆரம்பம் ,மற்றும் என்.சி.சி. சார்பில் காந்தி பிறந்த நாள் விழாகொண்டாடப்பட்டது.
நாமக்கல் மாவட்டம் குமாரபாளையத்தில் காந்தி பிறந்த நாள் விழா காங்கிரஸ் சார்பில் நகர தலைவர் ஜானகிராமன் தலைமையில் கொண்டாடப்பட்டது. காந்தியின் திருவுருவச்சிலைக்கு மாலை அணிவித்து மரியாதை செலுத்தப்பட்டது. பொதுமக்களுக்கு இனிப்புகள் வழங்கப்பட்டது. அரசு ஆண்கள் மேல்நிலைப்பள்ளியில் விடியல் ஆரம்பம் சார்பில் நடைபெற்ற விழாவில் என்.சி.சி. மாணவர்களுக்கு பல போட்டிகள் வைக்கப்பட்டு, பரிசாக புத்தகங்களை அமைப்பாளர் பிரகாஷ் வழங்கினார். என்.சி.சி. அலுவலர் அந்தோணிசாமி உள்பட பலர் பங்கேற்றனர்.
வேமன்காட்டுவலசு அரசு உயர்நிலைப்பள்ளியில் நடைபெற்ற விழாவில் பல முக்கிய பிரமுகர்கள் பங்கேற்று பேசி, போட்டிகளில் வெற்றி பெற்ற மாணவ, மாணவியர்களுக்கு பரிசுகள் வழங்கினர். தட்டான்குட்டை ஊராட்சி சார்பில் சடையம்பாளையத்தில் நடைபெற்ற கிராம சபா கூட்டத்தில் ஊராட்சி தலைவி புஷ்பா தலைமை வகித்து, 22 குடிசை வீடுகளை கான்கிரீட் வீடுகளாக கட்டித்தருதல், அண்ணா மறுமலர்ச்சி திட்டத்தின் கீழ் மழை நீர் வீணாகாமல் தடுக்க மணல் மூட்டைகளை வைத்து தடுத்தல், மலேரியா, டெங்கு நோய்கள் வராமல் தடுக்க வாட்டர் டேங்குகளை மாதம் ஒருமுறை சுத்தம் செய்தல், உள்ளிட்ட பல தீர்மானங்கள் நிறைவேற்றப்பட்டன. இதே போல் குப்பாண்டபாளையம் ஊராட்சி சார்பில் சானார்பாளையம் மாரியம்மன் கோவில் முன்பு கிராம சபா கூட்டம் ஊராட்சி தலைவி கவிதா தலைமையில் நடைபெற்றது. மேற்கு காலனி நகராட்சி நடுநிலைப்பள்ளி, நாராயண நகர் நகராட்சி நடுநிலைப்பள்ளி, புத்தர் தெரு நகராட்சி தொடக்கப்பள்ளி, அரசு உயர்நிலைப்பள்ளி உள்ளிட்ட பல பள்ளிகளில் காந்தி பிறந்தநாள்விழா கொண்டாடப்பட்டது.
