நாகையில் மாட்டு வண்டியில் சென்று மாட்டு பொங்கல் கொண்டாடிய கலெக்டர்

மாட்டு பொங்கல் பண்டிகையை முன்னிட்டு கால்நடைகளை வணங்கி பல்வேறு கிராமங்களில் பொங்கல் பண்டிகையை கொண்டாடி வருகின்றனர். அதன் ஒரு பகுதியாக நாகை மாவட்டம் அம்பல் கிராமத்தில் மாட்டு பொங்கல் கொண்டாட்டம் வெகு விமரிசையாக நடைபெற்றது. பொங்கல் விழாவிற்கு வருகை தந்த மாவட்ட ஆட்சியர் அருண் தம்புராஜ், தமிழ்நாடு மீன் வளர்ச்சி கழக தலைவர் கெளதமன், சட்டமன்ற உறுப்பினர் ஷாநவாஸ் ஆகியோரை மாட்டு வண்டியில் ஏற்றி மேல தாளத்துடன் கிராமத்திற்கு அப்பகுதி மக்கள் அழைத்து வந்தனர்.

பின்னர், நடந்த நிகழ்ச்சியில் கால்நடைகளை சூடம் ஏற்றி வணங்கி, கால்நடைத்துறை சார்பாக 100க்கும் மேற்பட்ட கால்நடை உரிமையாளர்களுக்கு தாது உப்பு கலவைகளை தமிழ்நாடு மீன் வளர்ச்சி கழக தலைவர் கெளதமன் வழங்கினார். தொடர்ந்து மேடையில் நாகை சட்டமன்ற உறுப்பினர் ஆளூர் ஷாநவாஸ், மீன் வளர்ச்சி கழக தலைவர் கெளதமன் ஆகியோர் தப்படித்து நடனமாடி கிராம மக்களோடு பொங்கல் விழாவை கொண்டாடி மகிழ்ந்தனர்.

தங்களது மாடுகளுக்கு மாலையிட்டு அலங்கரித்து மாட்டு பொங்கல் விழாவை கொண்டாடிய அப்பகுதி மக்கள் மஞ்சள் தண்ணீரை மாடுகளின் மீது தெளித்து உற்சாகத்தை வெளிப்படுத்தினார்கள். மேளதாளத்துடன் உற்சாகமாக நடைபெற்ற பொங்கல் விழாவில், ஏராளமான பொதுமக்கள் ஆர்வத்துடன் பங்கேற்று பொங்கல் விழாவை கொண்டாடி மகிழ்ந்தனர்.