ஈரோட்டில் 500-க்கும் மேற்பட்ட வீடுகளுக்குள் புகுந்த மழை வெள்ளநீர்
ஈரோட்டில் தொடர் கனமழை எதிரொலியால் 500-க்கும் மேற்பட்ட வீடுகளை வெள்ளநீர் சூழ்ந்ததால் பொதுமக்கள் கடும் அவதியடைந்துள்ளனர்.
HIGHLIGHTS
ஈரோடு ரங்கம்பாளையம் பகுதியில் வீடுகளுக்குள் புகுந்த மழை வெள்ளநீர்.
ஈரோடு மாநகர் மற்றும் மாவட்டத்தின் பல்வேறு இடங்களில் கடந்த சில நாட்களாக மாலை மற்றும் இரவு நேரங்களில் கனமழை பெய்து வருகிறது. இந்தநிலையில் நேற்றிரவு 9 மணி முதல் இன்று அதிகாலை 3 மணி வரை இடைவிடாமல் பல்வேறு இடங்களில் மழை பெய்தது. இதன் காரணமாக சாலைகளில் வெள்ளம் பெருக்கெடுத்து ஓடியது.
தாழ்வான இடங்களில் குளம் போல் தண்ணீர் தேங்கியது.குறிப்பாக ஈரோடு ரங்கம்பாளையம் , மூலப்பாளையம் , சேனாதிபதிபாளையம், சாஸ்திரிநகர் , குறிஞ்சி நகர், எம்ஜிஆர் நகர், அன்னை சத்யா நகர், முத்தாம்பாளையம், செட்டிபாளையம், சடையம்பாளையம் உள்ளிட்ட பகுதிகளில் 500-க்கும் மேற்பட்ட வீடுகளில் மழைநீர் புகுந்ததால் பொதுமக்கள் பெரிதும் அவதியடைந்தனர்.
இதுறித்து தகவலறிந்து வந்த தீயணைப்பு துறையினர் அப்பகுதி பொதுமக்களை பத்திரமாக மீட்டு பாதுகாப்பான இடத்தில் தங்க வைத்து தேவையான உதவிகளை வழங்கி வருகின்றனர். தற்போது தீபாவளி பண்டிகையையொட்டி சிறு வணிகர்களின் கடைகளுக்கும் மழை வெள்ளநீரானது புகுந்ததால், பொருட்கள் சேதமடைந்து வியாபாரம் செய்ய முடியாத சூழலுக்கு தள்ளப்பட்டுள்ளதாக வியாபாரிகள் வேதனையோடு தெரிவித்தனர்.
மேலும், நேற்று இரவு ரங்கம்பாளையத்திலிருந்து முத்தாம்பாளையம் செல்லும் ரயில்வே நுழைவு சுரங்க பாதையில் மழை வெள்ளநீரில் கார் சிக்கியது. இதனால் காரில் பயணம் செய்த 3 பேர் அதிர்ஷ்டவசமாக உயிர் தப்பினார். தற்போது, வெண்டிபாளையம் ரெயில்வே நுழைவு பாலத்தில் மழை வெள்ளநீர் தேங்கி நின்றதால் அந்தப் பகுதியில் போக்குவரத்து நிறுத்தப்பட்டது. இதனால் அப்பகுதியைச் சேர்ந்த பொதுமக்கள் கடும் அவதி அடைந்தனர்.
மாவட்டத்தில் நேற்று காலை முதல் இன்று காலை வரை பெய்த மழையின் அளவு விவரம் மில்லி மீட்டரில் பின்வருமாறு:-
ஈரோடு - 33.00 மி.மீ , பெருந்துறை - 51.00 மி.மீ , கோபி - 29.00 மி.மீ , தாளவாடி - 30.00 மி.மீ , சத்தி - 58.00 மி.மீ , பவானிசாகர் - 7.60 மி.மீ , பவானி - 15.60 மி.மீ , கொடுமுடி - 62.00 மி.மீ , நம்பியூர் - 64.00 மி.மீ , சென்னிமலை - 42.00 மி.மீ , மொடக்குறிச்சி - 26.00 மி.மீ , கவுந்தப்பாடி - 39.20 மி.மீ , எலந்தகுட்டைமேடு - 66.20 மி.மீ , அம்மாபேட்டை - 17.80 மி.மீ , கொடிவேரி - 45.00 மி.மீ , குண்டேரிப்பள்ளம் - 15.80 மி.மீ , வரட்டுப்பள்ளம் - 36.60 மி.மீ மாவட்டத்தில் மொத்த மழைப்பொழிவு - 638.8 மி.மீ ஆகவும், சராசரி மழைப்பொழிவு - 37.57 மி.மீ ஆகும்.
