ஈரோடு: 108 ஆம்புலன்ஸ் டிரைவர் விஷம் குடித்து தற்கொலை

erode news, erode news today- அந்தியூர் அருகே கடன் தொல்லையால் 108 ஆம்புலன்ஸ் டிரைவர் விஷம் குடித்து, உயிரிழந்த சம்பவம் சோகத்தை ஏற்படுத்தியுள்ளது.

ஈரோடு மாவட்டம் அந்தியூர் அருகே உள்ள பச்சாம்பாளையம், பள்ளிபாளையம் பிரிவு வாஸ்துநகரை சேர்ந்தவர் தங்கராசு மகன் சென்னியப்பன் (வயது 39). இவரது மனைவி கீதா (வயது 28). இவர்களுக்கு சரத் (வயது 6 ), லோகேஸ்வரன் (வயது 3) என்ற இரு பிள்ளைகள் உள்ளனர். சென்னியப்பன், அந்தியூர் அரசு மருத்துவமனையில் 108 ஆம்புலன்ஸ் டிரைவராக கடந்த 8 வருடங்களாக பணியாற்றி வந்தார். இந்தநிலையில், சென்னியப்பன் சொந்த விவசாய நிலத்தை விற்று பள்ளிபாளையம் பிரிவு வாஸ்துநகரில் பகுதியில் சொந்தமாக வீடு வாங்கியுள்ளார். இதனால், வீடு வாங்கிய வகையில் கடன் ஏற்பட்டுள்ளது. அதனால், சில நாட்களாக கடனை கட்ட முடியாத நிலையில், மன உளைச்சலுக்கு ஆளாகி இருந்து வந்துள்ளார்.

இதனையடுத்து அந்த வீட்டை விற்பனை செய்து, கடனை கட்டி விடலாம் என்று தனது மனைவியிடம் கூறிய வந்ததாக தெரிகிறது. இதற்கு மனைவி கீதா அதற்கு சம்மதிக்காததால், நேற்று முன்தினம் மாலை சென்னியப்பன், வீட்டில் விஷம் குடித்து மயங்கி நிலையில் இருந்துள்ளார். அதனைத்தொடர்ந்து, குடும்பத்தினர் அவரை மீட்டுஅந்தியூர் அரசு மருத்துவமனைக்கு முதல் சிகிச்சைக்க கொண்டு சென்றனர். பின்னர், மேல் சிகிச்சைக்காக நேற்று சேலம் அரசு மருத்துவமனைக்கு அனுமதிக்கப்பட்டார். அங்கு சிகிச்சை பெற்று வந்த சென்னியப்பன், சிகிச்சை பலனின்றி இன்று அதிகாலை உயிரிழந்தார். இதுகுறித்து அந்தியூர் போலீசில் அவரது மனைவி கீதா புகார் அளித்தார். இதனையடுத்து போலீசார் வழக்குப்பதிவு செய்து விசாரணை நடத்தி வருகிறார்கள். இச்சம்பவம் அப்பகுதியில் சோகத்தை ஏற்படுத்தியுள்ளது.

தற்கொலை என்பது எதற்கும் முடிவல்ல. மனித உயிரை மாய்த்துக்கொள்வதற்கான உரிமை யாருக்கும் இல்லை. தற்கொலை எண்ணம் மேலிடும் போது உரிய ஆலோசனை பெற்றால் புதிய வாழ்க்கை அவர்களுக்காக காத்துக்கொண்டிருக்கிறது. அதற்காகவே, மாநில சுகாதாரத் துறையின் தற்கொலை தடுப்பு எண் 104 மற்றும் 'ஸ்நேகா' தற்கொலை தடுப்பு உதவி எண் 044 – 24640050 என்ற எண்களை வெளியிட்டுள்ளது. அவர்களை தொடர்பு கொண்டு இலவசமாக ஆலோசனை பெறலாம்.