ரெட்டிப்பாளையம் பஞ்., தலைவரால் பள்ளி மாணவர்களின் உயிருக்கு ஆபத்து

செங்கல்பட்டு மாவட்டம், காட்டாங்கொளத்தூர் அருகே உள்ளது ரெட்டிப்பாளையம். இங்கு ஊராட்சி ஒன்றிய தொடக்க பள்ளி ஒன்று உள்ளது. இதே வளாகத்தில் 3 வயதுக்குட்பட்ட குழந்தைகள் படிக்கும் அங்கன்வாடி, பால்வாடி பள்ளியும் உள்ளது. இந்நிலையில் கடந்த ஒரு மாதத்திற்கு முன்பு பால்வாடி பள்ளி அருகே குடிநீர் குழாயில் அடைப்பு ஏற்பட்டது. இதனை சரி செய்யும் பணியை பஞ்., தலைவர் துவங்கினார். அப்போது சுமார் 10 அடி வரை பள்ளம் தோண்டப்பட்டது. ஆனால் இதுவரை அந்த பணி முழுமை பெறாததால் அந்த பள்ளத்தில் 4 அடிக்கு தண்ணீர் நிரம்பியுள்ளது. இதனால் குழந்தைகளின் உயிருக்கு அச்சம் ஏற்பட்டுள்ளது. இதுகுறித்து பஞ்., தலைவரிடம் தெரிவித்தும் அந்த பள்ளத்தை இதுவரை சீரமைக்கவில்லை. எனவே மாவட்ட கலெக்டர் குழந்தைகளின் உயிரை காக்க விரைந்து பள்ளிக்கு ஆய்வு நடத்தி பள்ளத்தை மூடவும், பஞ்., தலைவர் மீது ஒழுங்கு நடவடிக்கை எடுக்க வேண்டும் என்றும் இப்பகுதி பொதுமக்கள் கோரிக்கை விடுத்துள்ளனர்.